منوعات

ثمن الثقة العمياء

الفلوس دي موجودة؟
وقفت بالعربية على جنب الطريق، وطلعت موبايلي، واتصلت بمدير الموارد البشرية في شركتي في القرية الذكية.
أول ما رد، قلتله بوضوح
صباح الخير يا أستاذ طارق، معلش بكلمك بدري، بس كنت محتاج أوقف التحويل التلقائي لمرتبي على الحساب القديم، وعايز أحوله على حسابي الشخصي الجديد بداية من الشهر ده.
أكدلي إن الإجراءات هتخلص النهاردة قبل الظهر.
قفلت المكالمة، وحسيت إني أخدت أول خطوة صح بعد سنين من الغفلة.
بعدها طلعت على أقرب صيدلية، واشتريت كل الأدوية والفيتامينات اللي مكتوبة في روشتة رنا بالكريدت كارد بتاعي، وعديت على سوبر ماركت كبير مليت شنطة العربية أكل وفاكهة وحاجات للبيت، عشان أعوضها ولو بجزء بسيط عن اللي شافته.
طول الطريق وأنا راجع مدينة العبور، كنت برتب الكلام في دماغي.
هعتذرلها، وهقولها إني وقفت تحويل المرتب لأمي، وإني هبدأ معاها
صفحة جديدة، ومش هسمح إنها تحتاج حاجة تاني أبدًا.
وصلت العمارة الساعة اتناشر الضهر، وطلعت الشقة وأنا شايل الأكياس في إيدي.
فتحت الباب بالمفتاح ودخلت.
رنا… يا رنا أنا جيت!
محدش رد.
الشقة كانت هادية بشكل غريب، مفيش صوت في المطبخ ولا في الأوضة.
حطيت الأكياس على السفرة، ومشيت ناحية أوضة النوم، لكن قبل ما أوصل، عيني وقعت على حاجة خلتني أقف مكاني ومتحركش.
شنطة سفر كبيرة محطوطة جنب باب الشقة، وفوقها شنطة إيدها الصغيرة.
في اللحظة دي، خرجت رنا من أوضة النوم، وكانت لابسة هدوم الخروج والطرحة، ووشها شاحب وعينيها وارمة من العياط.
أول ما شافتني اتجمدت مكانها.
قربت منها بسرعة وقلت بلهفة
رايحة فين يا رنا؟ إيه الشنطة دي؟
بصت للأكياس اللي على السفرة، وبعدين بصتلي بنظرة هادية ومکسورة.
رايحة بيت أهلي يا محمود. أنا تعبت، ومبقاش فيا حيل أكمل في الوضع ده أكتر
من كدة.
مسكت إيدها وقلت بترجي
استني بس واسمعيني! أنا لسه جاي من عند أمي، وطلبت منها فلوسي، ووقفت تحويل المرتب ليها من النهاردة، وجبتلك كل علاجك! أوعدك إن كل حاجة هتتغير!
سحبت إيدها بهدوء، وهزت راسها بأسى.
للأسف يا محمود، التغيير ده جه متأخر أوي.
اتنهدت بضيق وقلت
على فكرة، أمي قالتلي على الكلام اللي إنتِ قولتيهولها لما روحتيلها من تلات شهور، وإنك هددتيها بالمحاكم وقلتي إنك متجوزاني عشان مرتبي. أنا مصدقتهاش طبعًا، بس عايز أعرف إيه اللي حصل بالظبط يومها!
سكتت رنا لحظة، وبصتلي بنظرة طويلة مليانة شفقة.
بعدين فتحت شنطة إيدها، وطلعت موبايلها، وفتحت تسجيل صوتي وقربته مني.
اسمع يا محمود… ده اللي حصل فعلاً في بيت مامتك يوم ما رحتلها، والسبب الحقيقي اللي خلاني ساكتة كل الشهور دي!
ضغطت على زرار التشغيل، وأول ما سمعت صوت أمي في التسجيل، حسيت إن الأرض
بتنسحب من تحت رجليا!
يتبع…

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى