
متعرفوش بقى، إنها قبل ما تمشي قالتلي كلام لو كنت عرفته من وقتها، كنت منعت الجوازة دي من أساسها!
بلعت ريقي، وحسيت إن الكلام وقف في زوري، وبصيت لأمي باستغراب.
كلام إيه ده يا أمي؟ رنا قالت إيه؟
اتنهدت أمي بعمق، ورجعت بضهرها لورا على الكرسي، وبصتلي بنظرة كلها عتاب.
مراتك لما جتلي وطلبت الفلوس، وقلتلها إن دي فلوس ابني ومقدرش أتصرف فيها من وراه، وشها اتغير وقلبت عليا. قالتلي بالحرف لو مخدتش الفلوس دي بالذوق، هاخدها بالقانون والمحاكم، وأنا أصلاً مستحملاه وعايشة معاه عشان مرتبه الكبير ده، ولولا كدة كنت خلعته من زمان عشان مش عارف يفتح بيت!
الكلام نزل على وداني زي الړصاص.
في أول ثانية، حسيت بدمي بيفور في عروقي، وكرامتي بتوجعني.
لكن بعدها بثانية واحدة، عقلي بدأ يشتغل، ولقيت إن الحكاية مش راكبة على بعضها خالص.
بصيت لأمي وقلت بهدوء غريب
مستحملاني عشان مرتبي؟ يا أمي إحنا متجوزين بقالنا أربع سنين، رنا مشفتش من مرتبي مليم واحد! دي هي اللي بتدفع الإيجار، وهي اللي بتصرف على الأكل والكهربا، لحد ما جالها سوء تغذية
وأنيميا! تبقى طمعانة في مرتبي إزاي؟
ارتبكت أمي لحظة، وبانت على وشها علامات الضيق، لكنها حاولت تداري بسرعة وقالت بصوت عالي
يعني إنت بتكدّب أمك وبتصدقها هي؟! ده جزاتي إني خاېفة على مصلحتك وبحوشلك قرشك؟
أنا مش بكدّبك يا أمي، بس الكلام مش منطقي.
وقفت من مكاني، وحطيت إيدي في جيبي، وقلت بنبرة حاسمة
عمومًا، سيبك من اللي اتقال زمان. دلوقتي أنا محتاج فلوسي، عايز أعرف الحساب اللي بتحوشي فيه في أنهي بنك، ومعايا كام بالظبط عشان هسحب جزء أعالج بيه مراتي، والباقي هحطه في حسابي الشخصي.
سكتت أمي.
السكوت طول أكتر من اللازم، وكوباية الشاي اللي قدامها كانت بردت تمامًا.
بصيتلها باستغراب وقلت
ساكتة ليه يا أمي؟ إحنا بنتكلم في أربع سنين، يعني بنتكلم في أكتر من تلاتة مليون ونص جنيه! الفلوس دي فين؟
فجأة، حطت أمي إيدها على راسها، وغمضت عينيها وهي بتتنفس بصعوبة مصطنعة.
آه يا راسي… ضغطي هيعلى عليا من كلامك ده. بقى جاي تحاسبني كأني حرامية يا محمود؟! أنا اللي ربيتك وكبرتك بقيت النهاردة موضع شك عشان خاطر ست؟
قربت منها بنفاد
صبر وقلت
يا أمي بلاش الكلام ده أرجوكي، أنا مقلتش إنك حرامية، أنا بسأل عن فلوسي! وريني دفتر التوفير أو كشف الحساب وريحيني.
رفعت راسها وبصتلي بعينين كلها ڠضب، وقالت بحدة
مفيش كشف حساب هيتفتح النهاردة! الفلوس مش مرمية في حساب جاري عشان تسحب منها وقت ما تحب، أنا حطاها في حاجات مضمونة وشهادات مقفولة عشان تجيب عائد، ولو اتفكت دلوقتي هتخسر نصها!
شهادات في أنهي بنك؟ وإزاي تتحط باسمك من غير ما أكون عارف؟
بقولك إيه يا محمود، أنا تعبت ومش قادرة أتكلم أكتر من كدة. لما تهدى وتعرف تكلم أمك بأدب، ابقى تعالى نتكلم!
قالت الجملة دي وقامت دخلت أوضتها وقفلت الباب وراها بالمفتاح.
وقفت مكاني في نص الصالة، ببص لباب الأوضة المقفول، وحاسس إن في حاجة غلط… غلط كبير أوي.
تهربها، عصبيتها، ورفضها إنها تقولي حتى اسم البنك، كل ده خلى الشك يدخل قلبي لأول مرة في حياتي.
نزلت من بيت أمي في روض الڤرج وأنا تايه، مش مصدق إني كنت مغيب بالشكل ده أربع سنين كاملة.
إزاي كنت بحوّل أكتر من سبعين ألف جنيه كل شهر من غير ما أسأل مرة واحدة عن
رقم حساب، أو أشوف ورقة واحدة تثبت إن




