قصص وروايات

سلفتي صورتني وأنا بغسل حمام حماتي

فيه مبلغ كان معايا في البيت، وأنا كنت فاكرة إن سامح بيتصرف فيه بمعرفتي، لكن اكتشفت إن فيه حاجات اتعملت من ورايا. سألتها فلوس إيه يا ماما؟ قالتلي أنا هقولك لما تيجي، لأن سامح وأحمد وصلوا عندي، وريهام كمان موجودة.

والموضوع لازم يتقفل النهارده. دخلت عند حماتي بعد حوالي نص ساعة، ولقيت أحمد واقف جنب سامح، وسامح وشه متغير تمامًا. أما ريهام فكانت قاعدة على الكنبة، ماسكة موبايلها، وبتحاول تبان هادية، لكن واضح من حركة إيديها إنها متوترة.

أول ما دخلت، حماتي مدت إيدها ليا وقالت تعالي يا ندى، اقعدي جنبي. سلمت عليها وقعدت، وأحمد بصلي وقال إنتِ سمعتي التسجيل كله؟ قلتله أيوه، وسمعت كمان إن فيه فلوس وحاجة مستخبية. سامح بص لمراته وقال بصوت مخنوق أنا عايز أفهم الأول، إيه حكاية الفلوس اللي ماما بتتكلم عنها؟

ريهام ردت بسرعة مفيش حكاية ولا حاجة، دي فلوس البيت وماما بتنسى، وإنتوا عارفين إنها ساعات بتتلخبط في الحسابات. حماتي بصتلها بحدة وقالت أنا ممكن أنسى أنا حطيت النظارة فين، لكن مش بنسى فلوسي راحت فين. وبعدين قامت بالعافية، وطلبت من أحمد يجيب لها درج صغير كان في أوضتها.

فتحته وطلعت منه دفتر قديم، ومعاه مجموعة إيصالات، وحطتهم على الترابيزة. قالت من حوالي ست شهور، أنا كان معايا مبلغ 48 ألف جنيه، كنت محوشاهم على جنب عشان مصاريف العلاج والعلاج الطبيعي، ولما ضهري تعب أكتر، بقيت محتاجة أعمل جلسات منتظمة وأجيب أدوية باستمرار.

وبصت لسامح وكملت أنا وقتها كنت بثق في مراتك، وطلبت منها تساعدني في ترتيب مصاريف البيت، واديتها 12 ألف جنيه تشتري بيهم احتياجات البيت والأدوية اللي ناقصة. وبعد فترة طلبت منها باقي الفلوس اللي كانت في الدرج، قالتلي إن المصاريف زادت وإنها دفعت منها حاجات كتير.

سامح سألها يعني إيه يا ماما؟ الفلوس كانت معاها؟ قالت لأ، أنا كنت سايبة الفلوس في الدرج، وكل شوية ألاقي مبلغ ناقص. ولما سألتها قالتلي إنها بتشتري حاجات للبيت، وإنها بتسجل كل حاجة. لكن لما طلبت منها الحساب، فضلت تأجلني.

ريهام دخلت في الكلام هو أنا كنت بسرق يعني؟ أنا كنت بصرف على البيت، ومش كل حاجة لازم أحتفظ بإيصالها! حماتي ردت أنا مش بطلب منك إيصال على كل رغيف عيش، أنا بطلب أعرف فلوسي راحت فين.

وبعدين طلعت ورقة من الدفتر وقالت أنا قعدت أحسب مصاريف العلاج والبيت، وراجعت كل اللي دفعته بنفسي، ولقيت إن فيه 30 ألف جنيه مشعارفة راحوا فين. سامح بص لريهام وقال إنتِ قولتيلي إن ماما بتديكي فلوس عشان تشتري حاجات للبيت، وإنك بتصرفي عليها من فلوسك كمان!

ريهام اتلخبطت وقالت أنا فعلًا صرفت، ومش فاكرة كل حاجة دلوقتي. حماتي فتحت موبايلها وقالت أنا كنت ساكتة، لكن لما سمعت كلامك في التسجيل، عرفت إن الموضوع مش مجرد نسيان أو اختلاف حسابات. وبعدين شغلت جزء تاني من تسجيل كانت محتفظة بيه، وكان صوت ريهام واضح وهي بتتكلم في مكالمة تانية أنا خدت من فلوس ماما شوية عشان أسدد اللي عليا، وهعوضهم بعدين.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى