
الأصول.. خدي بالك من الفلوس وإنتي مروحة، السوق مليان عيون خاېنة.
طلعت إلهام من عند الجواهرجي، والرعشة في رجليها كانت هادية وواثقة المرة دي. دخلت أول محل ملابس في وشها، اشترت لنسمة طقمين جداد وكوتشي أبيض نضيف، واشترت لنفسها جلابية سودا محترمة من قماش الكريب المتين وطرحة شيفون طويلة. ودخلت محل أكل، جابت فرخة مشوية سخنة ورز وسلطات وعيش طازة، وأكلت هي وبنتها لحد ما شبعوا وضحكوا لأول مرة من شهور.
بعدها، لفت على محلات القماش والخردوات. اشترت بكر خيط ألماني من المتين، وإبر مكن بمقاسات مختلفة، وشريط قياس، ومقص ترزي تقيل كربون صلب من اللي بياكل في التوب زي السکينة في الحلاوة، وتوبين قماش واحد روزالين والتاني كريب مشجر صيفي.. وشالت الحاجة كلها في أكياس كبيرة وركبت عربية مخصوص رجعتها البلد لحد باب العشة.
المغرب كان بيأذن لما نزلت قدام الجامع. البلد كانت بتهدا، وريحة طين الغيطان بعد الري كانت مالية الهوا، وصوت خوار البهايم المروحة من الحقول مالي السكك.
فتحت باب الدكان ودخلت الحاجة كلها، ونسمة كانت بتتنطط بفرحتها بالكوتشي الجديد والفستان اللي
لبسته على طول. ولعت لمبة الجاز اللي جابتها معاها، وعلقتها في مسمار في السقف، وبدأت الشغل بجد.
مكنتش بتضيع دقيقة واحدة. جابت جاز وقطن وبدأت تمسح الصدأ من على جسم المكنة السنجر.. كل ما تمسح حتة، يظهر اللون الأسود الملكي بتاع زمان، وتلمع الحروف الدهبي اللي مكتوب بيها Singer. حطت نقط زيت مكن في كل خرم وفي كل ترس، وبدأت تلف العجلة بإيدها براحة.. في الأول كانت بتعصلج وبتزيق زي ما تكون بتشتكي من سنين النسيان، بس مع كل لفة وزيت، التروس فكت، والصوت بقى ناعم وموسيقي يطرب الودن تكتك.. تكتك.. تكتك.
لضمت الإبرة بخيط أبيض، وجابت حتة قماش قديمة وجربت.. الغرزة طلعت مستقيمة، متقفلة، ومشدودة كأنها معمولة بأحدث مكنة في المصانع.
الله يرحمك يا ستيتة.. الله يرحمك ويجعل قپرك روضة من رياض الجنة.. صنيعتك لسه حية.
تاني يوم الصبح، السوق قام ورا الدكان، وريحة الخضار والفاكهة ملت المكان. إلهام فرشت على البنك القماش المشجر، وبدأت تفصل فستان بناتي صغير بكشكشة وأكمام منفوخة، كانت بتعمله زمان لبنات خالاتها وهي صبية. مقصها كان بيجري في القماش بنظام وفن، وغرز المكنة
كانت سريعة ومنتظمة لدرجة إن المارة في الشارع بدأوا يقفوا ويبصوا من الباب المفتوح.
الستات اللي في السوق، وهما مروحين بسبتات الخضار، لفت نظرهم صوت المكنة النضيف وموديل الفستان اللي اتعلق على شماعة خشب على واجهة الدكان. دخلت أول زبونة، ست ريفية طيبة باين عليها البساطة، لابسة شال أسود صباح الخير يا أبلة.. هو أنتي بتفصلي هنا؟ إلهام وقفت بابتسامة تملى الوش صباح الورد يا خالة.. أيوه، تفصيل وتصليح وكل اللي تأمري بيه. الست مسكت طرف الفستان المعلق، وعينيها لمعت ما شاء الله، إيه الخياطة النضيفة دي! ده شغل بندر ده ولا إيه؟ ده أحسن من شغل المعلم عبد الصمد اللي في أول البلد بمية مرة.. ده بيقعد الجلابية عنده شهرين ويطلعها كم أطول من كم! تحت أمرك يا خالة، هاتي قماشك وتستلميه في تلات أيام بالكتير، وعلى الفرازة. الست شهقت بفرحة تلات أيام؟! ده بجد؟! ده أنا عندي بنتي فرحها بعد جمعتين ومش لاقية حد يخلص لي فساتين خواتها.. ده أنا هروح أجيب لك القماش حالاً!
من اللحظة دي، بدأت السكة تتفتح.. البلد كانت عطشانة لحد بيفهم في الذوق والخياطة السريعة، وإلهام كانت
بتعامل




