
الفصل الثاني
عربية مدحت السودة عدّت وسابت وراها سحابة تراب تقيلة غطت مدق البلد لدقايق، وإلهام فضلت واقفة ورا شباك العشة الخشب، عينيها مثبتة على قفا العربية لغاية ما غطست في الزحمة. ريحة الخۏف اللي كانت بتشل ركبها امبارح اتبخرت، وحل مكانها حذر بارد عامل زي الشفرة الحامية؛ حذر ست اتلسعت من القريب قبل الغريب وبقت تقيس الخطوة بميزان دهب.
رجعت بصت لنسمة اللي كانت بتغمس حتة الجبنة القريش بلقمة العيش، ووشها الصغير رجع له شوية ډم بعد ما المية الساقعة غسلت تراب الشقا.
كلي على مهلك يا بتي، مفيش جري بعد النهاردة.
نزلت على ركبها جنب المكنة، ودخلت إيدها تحت تجويف الحديد، وسحبت الورقة من تاني بعيد عن عين البنت. الورقة دي مكنتش مجرد وصية كشكول عادية؛ دي كانت مطوية تلات تنيات، وفي ضهرها كلام مكتوب بقلم رصاص خفيف بس غارس في الورقة كأنه محفور بسن إبرة
والأرض البحرية اللي مدحت وأبوه بنوا عليها السرايا وكتبوها لعمارة.. أرض القيراطين اللي في حوض الزهار.. أصل عقدها الأزرق ډافناه تحت عتبة أوضة الخزين في البيت القديم.
. إياك تسيبوا حقي يروح لمصطفى وولده، ده شقا أبويا اللي انضحك عليا فيه وأنا صبية.
إلهام بلعت ريقها، والدم ضړب في نفوخها زي دقة طبلة. أرض السرايا؟ الجنينة الواسعة اللي كانت متباهية بيها مراة مدحت؟ السور العالي والعربية اللي بتلمع؟ كل العز ده مبني على أرض مسروقة من ستيتة؟! يعني مدحت مش بس رماها في الشارع وذلها، ده عايش ومنغنغ في شقا جدتها اللي رما مكنتها في التراب!
طبقت الورقة بحرص شديد، وحطتها في جيب جلابيتها الداخلي ودبستها بدبوس مشبك من بتوع الطرحة. طلعت من كيس الشاش غويشة واحدة بس من الأربعة، تقيلة ومحملة، ومسحتها في كم الجلابية لحد ما صفرتها لمعت في ضوء الشمس الداخل من الشباك، ولفت الباقي بإحكام ورجعته جوه تجويف المكنة وربطت المسامير بالراحة لحد ما الحديد قفل على بعضه بصوت تك مكتوم.
الشيخ حسن رجع على العصر، وكان ماسك في إيده مفتاح كبير مصدي مربوط في حتة سلك، وعلى وشه ابتسامة طيبة تفتح القلوب المقفولة.
يا ست إلهام، كلمت لك الحاج رضوان.. الراجل راجل بركة وقال لي ما دام غلبانة ووراها يتيمة، تدخل الدكان
وتسترزق، ومنين ما ربنا يوسعها تدفع إيجاره، وإن ما دفعتش مسامحها دنيا وآخرة.
إلهام حست إن الأرض بتتشال من تحتها من كرم ربنا. نزلت دمعة سخنة مسحتها بسرعة وقالت الله يسترك دنيا وآخرة يا عم الشيخ حسن، وربنا يجعله في ميزان حسناتك.. بس أنا مبحبش أبات وفي رقبتي مليم لحد. أنا معايا حاجة من ريحة المرحومة أمي، هنزل البندر أفكها وأدفع حق الإيجار ست شهور مقدم، وأصلح المكنة وأجيب توبين قماش نشتغل بيهم.
الشيخ حسن هز راسه برضا، وقال لها عين العقل يا بنتي.. بس البندر حيتانه كتير، والصاغة هناك عنيهم زي الصقور، لو حسوا إنك غريبة أو مضطرة هيبخسوا بحق حاجتك الأرض. اطلعي على دكان المعلم زكي الجوهري في سوق القيسارية، قولي له أنا جاية من طرف الشيخ حسن بتاع جامع سيدي منصور.. الراجل ده مبيحطش في جيبه قرش حرام، وميزانه أعدل من ميزان المۏت.
خدت إلهام الوصف تمام، ولبست نسمة طرحة صغيرة تغطي شعرها المنكوش، ونفضت هدومها على قد ما تقدر. مشيت ورا الشيخ حسن لحد ما وصلوا للدكان. كان في زقاق ضيق ورا سوق الخضار، دكان صغير حيطانه طوب أحمر
قديم وبابه




