
وبابه خشب شيش مطقطق من الشمس، بس كان له عتبة عالية وسقف صاج سليم ميسربش مية الشتا، وجواه بنك خشب عريض ينفع يتقص عليه القماش، وحتة مصطبة في الركن ممكن يتفرش عليها حصير ومخدة وتنام عليها هي والبنت مستورين ورا ستارة.
هنا قصرك يا بتي، والجامع بينك وبينه خطوتين، لو حسيتي بأي حاجة دقي على شباك الأوضة بتاعتي وأنا أجيلك بعكازي. تسلم يا راجل يا طيب، والله لو لفيت الدنيا ما كنت هلاقي أصلح منك ينجدنا.
سابت المكنة والشنطة المقطوعة جوه الدكان، وقفلت الباب الخشب بالضبة والمفتاح، وخدت نسمة في إيدها وطلعت على الموقف تركب عربية كبوت رايحة على البندر.
الطريق للبندر كان نص ساعة، بس عدى على إلهام كأنه دهر. إيدها مكنتش بتسيب جيبها اللي فيه الغويشة، حابسة عليها بين صوابعها كأنها ماسكة روحها. نسمة كانت باصة من شباك العربية المفتوح، عينيها بتلمع بفضول الأطفال وهي شايفة الزرع الأخضر بيجري جنب الطريق، ونسيت العياط والجوع لأول مرة من تلات أيام.
يا ماما، إحنا هنشتري ألوان؟ إلهام بصت لها وابتسمت من نص قلبها هنشتري ألوان، وعرايس، وجزمة جديدة،
وفستان أحمر بكشكشة زي اللي كنتي بتشوفيه في فتارين المحطة.. بس اصبري عليا شوية يا قلب أمك.
وصلوا البندر، ودخلوا سوق القيسارية. السوق كان زحمة تدوخ دكاكين قماش مرصوصة على اليمين والشمال، حراير وتيل وشيفونات من كل لون، وصوت مداق الصاغة بيرن في الودان، والبياعين بينادوا على الزباين قربي يا ست العرايس.. القماش اللي على الفرازة وصل!.
سألت إلهام لحد ما وصلت لدكان المعلم زكي الجوهري. دكان ضيق وبارد، جواه راجل عجوز لابس نظارة بكعب كباية، وساند دقنه على إيده وباصص في حجر كريم بعدسة مكبرة.
السلام عليكم يا حاج زكي. الراجل رفع راسه، وبص لها من فوق النظارة وعليكم السلام ورحمة الله.. أهلاً يا بنتي، أؤمري. أنا جاية لك من طرف عم الشيخ حسن، إمام جامع سيدي منصور في البلد اللي جنبكم.
أول ما سمع اسم الشيخ حسن، وشه اتفرد وابتسم ابتسامة صافية، وحط العدسة على المكتب ونفض إيديه يا مرحب، يا مرحب بريحة الشيخ حسن الحبيب.. خطوة عزيزة يا بنتي، اقعدي.. ارتاحي. تشربي إيه؟ شاي بنعناع؟ تسلم يا حاج، والله مستعجلة وعايزاك في مصلحة لوجه الله.
طلعت
إلهام الغويشة من جيبها وحطتها على القماش القطيفة الأسود اللي على البنك. الغويشة لما نزلت عملت صوت رنة تقيلة كشفت عن معدنها الأصلي. المعلم زكي مسك الغويشة، وعينيه لمعت من تحت النظارة، وقربها من النور ما شاء الله.. تبارك الخلاق! دهب كسر قديم عيار ٢١.. شغل صاغة زمان اللي ميتعوضش. ده نقش الستينات المجدول، دهب صافي مفهوش ولا نقطة نحاس مغشوشة.
حطها على الميزان الحساس، وبدأ يوزن ويحسب بالقلم الړصاص على ورقة بيضا صغيرة. وزنها ٢٦ جرام ونص يا بنتي.. وجرام النهاردة عالي.. ليكي عندي صافي بعد خصم المصنعية تلاتين ألف وخمسمية جنيه.
الرقم نزل على ودن إلهام زي الحلم. تلاتين ألف جنيه؟! من غويشة واحدة؟! والمكنة لسه فيها تلاتة غيرها وليرة دهب؟! حست بدوخة خفيفة ومسكت في طرف البنك، ودموعها كانت هتفر منها تاني، بس مسكت نفسها قدام الراجل.
راضية يا حاج؟ راضية ومباركة يا بنتي، ده حقك ولا بننقص منه حبة خردل.. استني أعد لك الفلوس.
فتح الخزنة وطلع رزم الفلوس، وعدهم قدامها ورقة ورقة، وحطهم في كيس قماش غامق وربطه لها الشيخ حسن وصاني على الغريب،
ووشك باين عليه




