
بيحاولوا يسيطروا على المضاعفات.
أحمد سأله
ممكن أشوفها؟
قال
لما حالتها تسمح.
فضل أحمد واقف قدام الباب.
وبعد ساعات، سمحوا له يدخل دقائق.
دخل ولقاها نايمة، والأجهزة حواليها.
قرب منها وهمس
مريم، أنا هنا.
فتحت عينيها بصعوبة.
قال
أنا مش هسيبك تاني.
بصتله، وحاولت تبتسم.
وبعدين حركت شفايفها بكلمة واحدة.
أحمد قرب ودنه منها.
سمعها بتقول
ماما
اتجمد.
كانت في عز تعبها لسه بتسأل عني.
خرج أحمد بسرعة وناداني.
أمي، مريم عايزاكي.
دخلت وأنا بترعش.
قربت من سريرها ومسكت إيديها.
قلت
أنا هنا يا بنتي.
فتحت عينيها وبصتلي.
كان في نظرتها كلام كتير.
قلت وأنا بعيط
سامحيني يا مريم سامحيني على كل كلمة ۏجعتك، وعلى كل مرة سبتك لوحدك.
حاولت تتكلم.
قربت منها أكتر.
قالت بصوت ضعيف
يا ماما أنا كنت
وسكتت.
استنيت تكمل.
لكن التعب غلبها، وغمضت عينيها.
الدكتور طلب مني أخرج عشان يطمن عليها.
خرجت وأنا بعيط.
أحمد سألني
قالتلك إيه؟
قلت
كانت عايزة تقولي حاجة بس مقدرتش تكمل.
قعد جنبي، وفضلنا ساكتين.
ولأول مرة، مكنش عندنا غير أمنية واحدة
إن ربنا يدي مريم فرصة تانية.
مش عشان هي محتاجة فرصة تعيش وسطنا.
لكن عشان إحنا اللي كنا محتاجين فرصة نصلح اللي كسرناه.
مع أول ضوء في صباح اليوم العاشر، خرج الدكتور من الرعاية.
كان وشه متغير.
أحمد وقف بسرعة.
خير يا دكتور؟ مريم عاملة إيه؟
الدكتور بصله، وبعدين بصلي.
وقال بهدوء
إحنا عملنا كل اللي نقدر عليه، لكن حالتها اتدهورت جدًا.
أحمد مسك دراعه.
يعني إيه؟ أنا عايز أشوف مراتي!
الدكتور قال
اتفضلوا معايا.
مشينا وراه.
وأنا كل خطوة كنت بحس إن رجلي تقيلة.
ولما وصلنا قدام الباب، أحمد وقف فجأة.
بصلي وقال بصوت مكسور
يا أمي لو مريم قامت، أنا هغير كل حاجة.
هزيت راسي وأنا بعيط.
وأنا كمان يا ابني.
لكننا مكناش نعرف إن فيه وعود، مهما كانت صادقة، ممكن تيجي بعد فوات الأوان.
الجزء الثالث والأخير لما دارت الأيام
بعد عشر أيام في المستشفى، مريم ماټت والست اللي كانت واقفة ورا الشباك مستنية حد ينادي عليها، خرجت من البيت للمرة الأخيرة، والبيت كله واقف يودعها! لكن الحكاية منتهتش بمۏتها، لأن السنين دارت، وكل واحد فينا شاف وجعه بعينه، لحد ما ابني أحمد وقف قدام شباك بنته وشافها في نفس مكان مريم، وسمع منها نفس الكلام اللي مراته كانت بتقوله زمان وساعتها عرف إن أصعب عقاپ ممكن يعيشه الإنسان، إنه يفضل عايش وضميره مش سايبه يرتاح.
الدكتور كان واقف قدامنا، وأنا وأحمد مستنيين منه كلمة تطمنا.
لكن الكلمة مجتش.
قال بصوت هادي
البقاء لله مريم توفاها الله.
أحمد فضل باصصله، كأنه مش فاهم.
وبعدين قال
حضرتك بتقول إيه؟ أنا كنت لسه بكلمها امبارح!
الدكتور نزل عينيه.
ربنا يصبركم.
أحمد رجع خطوتين لورا، وسند على الحيطة.
وبعدين هز راسه پعنف.
لأ مريم مستنياني! أنا وعدتها إني هعوضها!
دخل الأوضة قبل ما حد يلحقه.
قرب من السرير، ومسك إيديها.
مريم قومي يا حبيبتي، أنا جيت أهو.
فضل يهز إيديها برفق.
افتحي عينيكي، أنا هقعد معاكي النهارده كله مش هروح عند حد.
لكن مريم مردتش.
حط راسه جنب إيديها، واڼفجر في العياط.
سامحيني يا مريم أنا اتأخرت عليكي أوي!
أما أنا، فوقفت عند الباب.
مكنتش قادرة أدخل.
كنت فاكرة كل مرة كانت بتناديني فيها، وكل مرة كنت بتجاهلها.
افتكرت الأكل اللي رميته، والهدية اللي اتريقت عليها، والدموع اللي شفتها ومهتمتش.
وافتكرت الشباك.
الشباك اللي كانت بتقف وراه تتفرج علينا وإحنا بنضحك.
وفجأة حسيت إن البيت كله بقى ضيق عليا.
يوم جنازتها، الناس كانت كتير.
ستات من الجيران، وقرايبها، وناس مكنتش أعرف إن مريم ليها علاقة بيهم.
واحدة من جاراتها كانت بټعيط وتقول
يا حبيبتي يا مريم، دي كانت تيجي تقعد عندي لما تحس بالوحدة.
قربت منها وسألتها
كانت بتقولك إيه؟
بصتلي بحزن.
كانت بتقول إنها نفسها تحس إن ليها أهل.
حسيت إن حد طعنني في قلبي.
الجارة كملت
كانت بتحكيلي إنها بتعمل أكل وتبعته لحضرتك، وتفضل مستنية تعرف عجبك ولا لأ.
سكتت لحظة، وبعدين قالت
وكانت كل ما ترجع زعلانة تقوللي يمكن ماما تعبانة النهارده، بكرة هتبقى أحسن معايا.
مقدرتش أسمع أكتر.
قعدت على أقرب كرسي وفضلت أعيط.
بعد العزا بثلاث أيام، أحمد طلع شقة مريم.
كانت زي ما سابتها.
الهدوم مترتبة، والمطبخ نضيف، وعلى الترابيزة كوباية كانت بتشرب فيها الشاي.
دخل أوضة النوم، وفتح الدولاب.
لقى علبة الهدية اللي كانت جايباهالي.
نفس الطرحة اللي رفضتها.
وجنبها ورقة صغيرة مكتوب فيها
دي لماما يمكن في يوم ترضى تاخدها مني.
أحمد أخد العلبة ونزل بيها عندي.
حطها قدامي وقال
دي مريم كانت جايباهالك.
أول ما شوفتها، عرفت.
مديت إيدي أخدتها، وفضلت أحضنها وأعيط.
قال
كانت محتفظة بيها يا أمي، رغم إنك رفضتيها.
بصيتله وقلت
يا ريتني كنت أخدتها منها يا أحمد.
رد بصوت مكسور
وأنا يا ريتني كنت أخدتها في حضڼي لما كانت بټعيط.
سكتنا.
وبعدين أحمد طلع من جيبه الكراسة اللي كان لقاها في درجها.
قال
مريم كانت بتكتب كل حاجة.
فتح آخر صفحة.
وكان مكتوب فيها
أنا مش زعلانة من قضاء ربنا، أنا زعلانة من الناس اللي افتكروا إن حرماني من الخلفة معناه إني محرومة من الحق في الحب والاحترام.
أنا عمري ما کرهت يوسف، ولا تمنيت لنجلاء الشړ. كنت بس بتمنى أحمد يفتكر إني مراته، وماما تعتبرني بنتها.
نفسي في يوم أقعد معاهم في الساحة، من غير ما حد يعايرني، ومن غير ما أضطر أهرب لشقتي وأتفرج عليهم من ورا الشباك.
أحمد وقف عن القراءة.
وبعدين قال
إحنا عملنا فيها إيه يا أمي؟
مقدرتش
أرد.
لأن الإجابة كانت واضحة.
إحنا كسرنا قلب إنسانة كانت كل أمنيتها تحس إنها محبوبة.
مرت سنة.
وبعدين سنتين.
وأحمد اتغير.
كان بيشتغل ويرجع البيت، يقعد مع يوسف شوية، وبعدين يطلع شقة مريم.
نجلاء كانت تتضايق.
إنت لسه بتطلع فوق ليه يا أحمد؟
فيرد
عشان دي شقة مراتي.
تقول
مراتك ماټت يا أحمد، وإنت لازم تعيش حياتك.
يبصلها ويقول
أنا عايش يا نجلاء بس مش كل اللي عايشين مرتاحين.
في مرة، نجلاء طلعت وراه.
لقته قاعد على نفس الكرسي اللي كانت مريم بتقعد عليه جنب الشباك.
سألته
إنت بتعمل إيه هنا؟
قال
بحاول أفهم كانت بتستنى إيه.
بصتله باستغراب.
فكمل
مريم كانت بتقف هنا كل يوم، وتشوفنا كلنا تحت. وأنا كنت شايفها ومبطلعش لها.
نجلاء قالت
خلاص يا أحمد، اللي فات ماټ.
بصلها وقال
اللي فات مماتش يا نجلاء اللي ماټت مريم، إنما اللي عملناه فيها لسه عايش جوانا.
ومن يومها، بدأت المسافة تكبر بين أحمد ونجلاء.
مكنش بيظلمها ولا بيمنع عنها حقها، لكنه مبقاش يعرف يديها الونس اللي كانت مستنياه.
كان حاضر بجسمه، وغايب بقلبه.
ومع مرور السنين، نجلاء تعبت من الصمت.
بقت تقضي معظم وقتها عند أهلها، وبعد فترة طلبت الطلاق.
أحمد حاول يصلح بينهم، لكن العلاقة كانت فقدت روحها.
وفي النهاية، انفصلوا بهدوء.
يوسف فضل يزور أبوه، ونجلاء كملت حياتها.
أما أحمد، ففضل لوحده.
السنين عدت، وأنا كبرت.
بناتي اتجوزوا واستقروا، وكل واحدة بقت مشغولة ببيتها وعيالها.
كنت زمان أول ما أتصل بواحدة فيهم، تسيب اللي في إيديها وتيجي.
لكن مع الوقت، المكالمات قلت.
والزيارات بقت أقل.
وفي يوم تعبت.
بدأت رجلي توجعني، وبقيت مش قادرة أتحرك زي الأول.
الدكتور قال إني محتاجة رعاية ومساعدة مستمرة.
في البداية، بناتي كانوا بييجوا يتناوبوا عليا.
لكن بعد كام أسبوع، بدأت الأعذار.
سحر تقول
معلش يا ماما، جوزي تعبان ومحتاجة أقعد معاه.
وهدى تقول
الولاد عندهم امتحانات، ومش هقدر أسيبهم.
ومنى تقول
أنا عندي ظروف، خلي أحمد يجيبلك واحدة تساعدك.
وأحمد فعلًا جابلي ست تساعدني في الأكل والنضافة والدواء.
لكن الست كانت بتيجي ساعات وتمشي.
وأنا كنت محتاجة حد يقعد معايا.
حد يسمعني.
حد يطبطب عليا.
وفي ليلة شتوية، كنت نايمة على السرير، وحسيت بعطش شديد.
ناديت
يا سحر!
محدش رد.
يا هدى!
برضه محدش رد.
حاولت أقوم، لكن رجلي وجعتني.
فضلت أبص ناحية الباب.
وافتكرت مريم.
افتكرت صوتها وهي بتنادي من تحت السلم
يا ماما، محتاجة مني حاجة؟
وافتكرت إني كنت أحيانًا أعمل



