قصص وروايات

سلفتي حكايات احمد عمار

سلفتي كانت بتعايرني بالعقم قدام العيلة، وتقول لجوزي اتجوز وخلف بدل ما تضيع عمرك معاها… استحملت إهانتها سنين، لحد ما في يوم وقفت قدامها وقلت لها كلمة خلت وشها يخطف ألوان!
هو إنت لسه مستحمل؟! يا ابني فوق لنفسك، إنت مش صغير، وعايزين نفرح بيك ونشوفلك عيل يشيل اسمك. اتجوز واحدة تخلفلك بدل ما تفضل مستني مع واحدة مش هتجيبلك عيال!
الكلام ده اتقال على سفرة الغدا، وسط العيلة كلها، وسلفتي كانت بتبصلي وهي بتضحك، كأنها قالت نكتة والكل المفروض يضحك عليها.
أنا مسكت المعلقة في إيدي، وبصيت في طبقي، وحاولت أعدّي الموقف زي كل مرة. لكن المرة دي جوزي كان قاعد جنبي، وسمع الكلام، وبدل ما يوقفها عند حدها، اكتفى إنه يقول
خلاص يا سحر، مش كل مرة نفس الكلام.
ضحكت سلفتي وقالت هو أنا قلت حاجة غلط؟ ده أنا خايفة على أخويا. الراجل من حقه يبقى أب، ولا إيه؟
رفعت عيني وبصتلها، ولقيتها مستمتعة بكل كلمة بتقولها. كانت عارفة كويس إن موضوع الخلفة بيوجعني، وعارفة إني بقالي سنين بتردد على الدكاترة وبعمل تحاليل وفحوصات، ومع ذلك كانت بتختار كل مناسبة عائلية عشان تفكرني إني في نظرها ست ناقصة.
أنا اسمي منى، متجوزة أحمد من سبع سنين. أحمد أخو جوز سحر، وسحر كانت متجوزة أخوه الكبير. من أول يوم دخلت فيه العيلة وهي بتتعامل معايا على إني ضيفة مش مرغوب فيها، لكن بعد ما عدّى أول سنة جواز من غير حمل، بدأت معاملتها تتغير أكتر.
في البداية كانت تسألني قدام الناس مفيش أخبار حلوة؟
وبعدها بقت تقول روحي اكشفي عند دكتور شاطر، مش معقول كل الناس بتخلف وإنتوا لأ.
ولما عرفت إني بتابع مع دكتور متخصص، بدأت تدخل في تفاصيل مش من حقها تعرفها، وتسأل أحمد عن نتيجة التحاليل، وتلمح إن المشكلة أكيد عندي أنا.
كنت برجع من الزيارات العائلية وأدخل أوضتي أعيط، وأحمد يحاول يهديني ويقولي معلش، إنتِ عارفة سحر لسانها طويل، متاخديش كلامها على صدرك.
كنت بسأله يعني أنا المفروض أستحمل إنها تهينني كل مرة عشان هي لسانها طويل؟
يرد عليا هعمل إيه؟ دي مرات أخويا، ومش عايز مشاكل بين العيلة.
كنت بسكت، مش عشان مش قادرة أرد، لكن عشان كنت بحاول أحافظ على بيتي وعلى جوزي، وكنت دايمًا بقول لنفسي إن ربنا قادر يرزقنا في أي وقت.
لكن سحر ما كانتش بتسيب فرصة تعدّي.
في مرة كنا في عيد ميلاد بنت أخو أحمد، وكانت العيلة كلها متجمعة. واحدة من قرايبنا كانت بتتكلم عن ابنها اللي داخل المدرسة، وسحر بصتلي وقالت
يا بختك يا منى، عندك وقت تعملي اللي إنتِ عايزاه، لا وراكي عيال ولا مدارس ولا مسؤولية.
ابتسمت ابتسامة مجاملة، لكن واحدة من الموجودين قالتلها عيب يا سحر، مش بإيدها.
ردت بمنتهى البرود أنا بتكلم عادي، هو إحنا هنفضل نمشي على قشر بيض عشان محدش يزعل؟
رجعت البيت يومها وقلت لأحمد إن أنا مش هروح عندهم تاني، لكنه اتضايق وقال إن الموضوع مش مستاهل وإنه مش عايزني أقطع علاقتي بأهله.
ومرت الأيام، وكل مرة كنت بقول دي آخر مرة، لحد ما جه يوم الغدا اللي بدأت بيه حكايتي.
بعد ما خلصنا أكل، سحر قامت تعمل شاي، ولما عدّت من جنبي قالت بصوت واطي لكنه مسموع
بصي يا منى، أنا لو مكانك كنت سيبت الراجل يعيش حياته. مش معقول تمنعيه من إنه يبقى أب عشان إنتِ عايزة تفضلي مراته وخلاص.
المرة دي ما قدرتش أبلع الكلام.
قمت من مكاني، وحطيت الكوباية على الترابيزة، وبصتلها وقلت
إنتِ بقالك سنين بتتكلمي عن خلفتي كأنك إنتِ اللي بتدفعي تمن علاجي، وكأن جوزي عايش معاكي مش معايا. بس قبل ما تنصحيه يتجوز ويخلف، يا ريت تبصي لحياتك إنتِ الأول.
وشها اتغير، وقالت بعصبية قصدك إيه؟
قلت وأنا ثابتة في مكاني قصدي إن آخر واحدة في العيلة المفروض تتكلم عن الجواز والخلفة هي إنتِ.
الكل سكت، وأحمد وقف وقال منى! إنتِ بتقولي إيه؟
بصيتله وقلت أنا هقول اللي سكت عنه سنين. مش كل مرة هي تهينني وإنت تطلب مني أعدّيها عشان دي مرات أخوك.
سحر بدأت تزعق إنتِ بتقللي أدبك معايا؟ ده أنا أكبر منك!
قلت الاحترام مش بالسن يا سحر، واللي بيجرح الناس في أكتر حاجة بتوجعهم ما يستناش منهم يفضلوا ساكتين للأبد.
حاولت تقوم من مكانها، لكن حماتي مسكت إيدها وقالتلها خلاص يا بنتي، اقعدي.
سحر شدت إيدها وقالت لأ، أنا مش هسكت! هي تقصد إيه بكلامها؟
بصتلها وقلت الجملة اللي خلت وشها يخطف ألوان
أنا على الأقل مش محتاجة أتكلم عن عقم غيري عشان أغطي على اللي مخبياه عن جوزي… ولو عايزة أتكلم، ممكن أقول كل حاجة قدامهم.
في اللحظة دي، سحر سابت الكوباية من إيدها، وبصتلي برعب، وأحمد وقف بيني وبينها وهو بيسألني
منى… إنتِ تعرفي إيه؟
وأنا بصيت لسحر وقلت اسألي مرات أخوك إيه اللي حصل في آخر زيارة ليها للدكتور، وليه كانت مصممة تعرف نتيجة تحاليلي بالتفصيل.
سحر وشها اصفر، وحماتي بصتلها باستغراب، أما أنا فكنت عارفة إن الكلام اللي اتقال على السفرة النهارده مش هيعدّي زي كل مرة.
لأن سحر كانت فاكرة إنها الوحيدة اللي من حقها تفتح سيرة الخلفة قدام العيلة… لكنها ما كانتش متخيلة إن اليوم ده هييجي وأضطر أفتح أنا كمان الكلام اللي كانت بتحاول تدفنه.
روايات_احمد_عمار
يتبع…
الجزء الثاني السر اللي سحر كانت مرعوبة ينكشف
سحر فضلت واقفة مكانها، عينيها بتتنقل بيني وبين أحمد، وإيديها بتترعش وهي بتحاول تلم نفسها قدام العيلة.
أحمد قرب مني وقال بصوت واطي
منى، أنا عايز أفهم. إنتِ تعرفي إيه بالظبط؟
بصيتله، وبعدها بصيت لسحر وقلت
أنا هحكيلك، بس المرة دي مش هسكت، ومش هسمح لحد يقاطعني.
حماتي قالت باستغراب
يا بنتي هو فيه إيه؟ إنتوا هتفضلوا تتكلموا بالألغاز لحد إمتى؟
سحر دخلت بسرعة
مفيش حاجة يا ماما، دي منى بتحاول تعمل فيها إنها عارفة أسرار الناس، وكل ده عشان أنا قلتلها كلمة زعلتها.
ضحكت بهدوء وقلت
كلمة؟ إنتِ شايفة إنك لما تقولي لواحدة قدام عيلتها إن جوزها يسيبها ويتجوز غيرها عشان تخلف، دي كلمة عادية؟
ردت بعصبية
ما هو الراجل من حقه يخلف!
قلت
طبعًا من حقه، ومن حقي أنا كمان أحافظ على كرامتي. بس الغريب إنك مصممة تعرفي نتيجة تحاليلي أكتر مني، وبتسألي عن تفاصيل علاجي، وبتحاولي تدخلي في كل زيارة للدكتور، وكأن الموضوع يخصك.
أحمد بصلي
إنتِ بتقولي إنها كانت بتسأل عن تحاليلك ليه؟
سحر ردت بسرعة
عشان كنت بطمن عليها! مش دي مرات أخو جوزي؟ هو السؤال بقى جريمة؟
قلت
السؤال مش جريمة، لكن اللي عملتيه بعد السؤال هو الجريمة.
ساعتها طلعت موبايلي وفتحت صورة كنت محتفظة بيها من حوالي شهرين.
كانت صورة لرسالة على تليفوني، من رقم مجهول، فيها صورة ورقة طبية عليها اسمي، وتحتها تعليق
خليكي عارفة إنك بتتعبي نفسك على الفاضي، والموضوع مش هيتحل بالعلاج.
أنا وقتها افتكرت إن حد بيهزر معايا، لكن لما ركزت في الورقة، اكتشفت إنها مش نسخة من التحاليل اللي عملتها.
كان فيها بيانات متغيرة، واسم الدكتور، لكن النتيجة مختلفة عن نتيجتي الحقيقية.
حطيت الموبايل قدام أحمد وقلت
بص كويس.
أحمد مسك التليفون، وفضل يقرا، وبعدها رفع عينه ليا.
إيه ده يا منى؟ مين بعتلك الكلام ده؟
قلت
معرفش، لكن عرفت بعد كده إن الصورة اتصورت من ملفي الطبي في العيادة.
سحر اتحركت في مكانها وقالت
وإيه علاقة ده بيا؟
رديت
لأنك كنتِ موجودة يومها.
وشها اتغير.
أحمد بص لها
سحر؟ إنتِ كنتِ مع منى عند الدكتور؟
سحر اتلخبطت وقالت
أنا كنت رايحة أعمل كشف عند دكتورة قريبة من العيادة، وشوفتها بالصدفة.
قلت
لأ، إنتِ ما شوفتينيش بالصدفة. إنتِ دخلتي معايا الاستقبال، وفضلتي تسأليني عن التحاليل، ولما خرجت أجيب الدوا، فضلتي لوحدك مع الموظفة اللي كانت ماسكة الملف.
سحر صرخت
إنتِ بتتهميني بحاجة كبيرة أوي!
قلت

السابق1 من 5
تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى